Grabitja e shekullit, ja si Rama u dha pa tender arabo-kinezëve privacinë e shqiptarëve, 120 mln dollarë kredi për
Grabitja e shekullit tashmë ka marrë jetë, pasi dje u vulos zyrtarisht projekti “Smart City”, një skemë e cilësuar si modernizim, por që në thelb përfaqëson dorëzimin pa tender të privatësisë së shqiptarëve dhe të dhënave sensitive të shtetit drejt interesave arabo-kineze, me një faturë prej 120 milionë dollarësh që rëndon mbi taksapaguesit. Nën firmën e Edi Ramës dhe Belinda Ballukut, kostot u dyfishuan në heshtje nga 60 në 118 milionë dollarë pa asnjë ndryshim real në zërat e projektit, duke ngritur dyshime serioze për pazare politike dhe korrupsion të strukturuar.
Marrëveshja me kompaninë Presight AI, e lidhur me grupin G42 dhe me bashkëpunime të mëparshme me teknologji kineze, të cilën gazeta “SOT” e ka denoncuara në disa shkrime investigative, përbën një alarm të hapur për sigurinë kombëtare dhe sovranitetin digjital. Ndërsa qeveria flet për “sy magjik” dhe rritje të kapaciteteve policore, në realitet po ndërtohet një sistem masiv survejimi që monitoron lëvizjet, fytyrat, targat dhe jetën e përditshme të qytetarëve. Pa garanci reale për kontrollin e të dhënave dhe me varësi teknologjike nga kontraktori i huaj, rreziku i ndërhyrjeve, spiunazhit dhe abuzimit është real dhe i dokumentuar nga shqetësimet perëndimore. Kredia me interesa më të larta se standardet për vendet në zhvillim tregon se ky nuk është partneritet strategjik, por borxh politik i kushtueshëm.
Pa tender, pa garë dhe pa transparencë, projekti shndërrohet në simbol të kapjes së shtetit dhe shitjes së interesit publik. Kujtesa e ndalimit të teknologjisë 5G kineze nga presioni amerikan e bën edhe më të rëndë këtë vendim, pasi dëshmon se rreziku është i njohur, por i injoruar. Qeveria premton siguri dhe eficiencë, por shmang pyetjen themelore se kush do të ketë çelësat e këtij sistemi dhe kush do të mbajë përgjegjësi nëse të dhënat përfundojnë në duar të gabuara. Në vend të qyteteve të zgjuara, po ndërtohet një arkitekturë frike dhe kontrolli, ku qytetari monitorohet, por pushteti mbetet i pakontrolluar. Pra kjo marrëveshje nuk është thjesht një projekt teknologjik, por një akt politik me pasoja afatgjata, ku liria, privatësia dhe sovraniteti shkëmbehen për kredi, kamera dhe interesa të errëta.
About The Author
