Albin Kurti takohet në Stamboll me nobelistin turk: Orhan Pamuk e njihte shumë mirë Kosovën
Kryeministri Albin Kurti ka njoftuar se është takuar në me shkrimtarin nobelist turk, Orhan Pamuk, me të cilin tha se kanë diskutuar për shumë çështje.
Kurti shkroi në Facebook të marten se Pamuk ishte i interesuar për Kosovën, shqiptarët dhe për Ballkanin, duke theksuar se “temat e bisedës ndërroheshin më shpesh se pjatat mbi tryezë”.
“Në fillim nuk i besova doktorit Bilgin Sait, që shkrimtari Orhan Pamuk po më fton për darkë. Gjersa afrohej mbrëmja, minutat më dukeshin të gjata porsi orët, ndërkaq tri orë e gjysmë me të më ikën porsi minutat. Në restoranin Sur Balık-Cihangir të lagjes Beyoğlu në Stamboll temat e bisedës ndërroheshin më shpesh se pjatat mbi tryezë”, ka thënë Kurti.
Me shkrimtarin turk, Kurti tha se arritën “të shkruajnë përmbledhje hyrëse të kapitujve të miqësisë sonë të ardhshme”.
“Artisti Orhan Pamuk, fitues i çmimit Nobel për Letërsi në vitin 2006, ka një dashamirësi spontane dhe vëmendje të frikshme. Dhe, aq shumë i interesuar për Kosovën, shqiptarët, Ballkanin. Nder që nuk e shpjegoj, kënaqësi që nuk e përshkruaj”, shtoi ai.
Pamuk, 71-vjeçar, është i njohur për shumë vepra, por më të njohurat konsiderohen “Muzeu i Pafajësisë” dhe “Emri im është e kuqja”.
Ministria e Kulturës, Rinisë dhe Sporteve pati paralajmëruar vitin e kaluar se Pamuk do ta vizitonte Kosovën, por vizita është shtyrë.
About The Author
