Protesta e opozitës më 7 tetor, Sokol Bizhga takim me shefat dhe drejtuesit e Policisë së Tiranës, në diskutim masat e bluve ndaj tubimit.

Drejtori i Komanduar i Policisë së Shtetit, Sokol Bizhga, ka zhvilluar një takim me të gjithë shefat e Komisariateve të Tiranës si dhe drejtuesit e Policisë së Tiranës, lidhur me protestën që pritet të mbajë opozita më 7 tetor.

Mbledhja u zhvillua në orën 13:00 dhe fokusi i diskutimeve ishin masat që uniformat blu duhet të ndërmarrin në këtë tubim të thirrur nga Partia Demokratike pasditen e 7 tetorit.

Protesta do të mbahej më 6 tetor por më pas u zhvendos për ditën e hënë.

Deputeti i PD, Edi Paloka, bëri më dije gjate mbledhjes së Këshillit Kombëtar të PD-së, se protesta do të nisë të hënë në orën 18:00 para kryeministrisë dhe më pas do të shtrihet në të gjithë rrugët e Tiranës.

“Partia Demokratike më 7 tetor, në orën 18:00, fton qytetarët të bëhen bashkë në Tiranë të bashkohet kundër padrejtësive. Mos pajtimi me padrejtësinë dhe më të keqen, fillon nga Kryeministria dhe do të shtrihet në të gjithë rrugët e Tiranës”, tha Paloka.

Kujtojmë se në këtë datë gjithashtu është dhe dita e parë e nisjes së vitit akademik për studentët, gjë që do krijojë bllokime të konsiderueshme në rrugët e kryeqytetit.

Kujtojmë se Këshilli Kombëtar i PD-së u mblodh më 29 Shtator, dy ditë pas dënimit me një vit burg të deputetit demokrat, Ervin Salianji, për kallëzim të rremë.

Salianji po vuan dënimin në bugun e Fierit, ndërsa demokratët e kanë cilësuar vendimin e Gjykatës së Apelit ndaj tij si një proces gjyqësor politik.

About The Author