Prada blen shtëpinë rivale të modës Versace
Grupi Prada njoftoi arritjen e marrëveshjes për blerjen e Versace të Italisë nga grupi luksoz amerikan Capri Holdings me kushte që vlerësojnë shtëpinë e modës në 1.25 miliardë euro (1.4 miliardë dollarë).
Prada deklaroi se shtimi i estetikës “shumë të dallueshme” të Versace “përbën një shtesë thellësisht plotësuese” në portofolin e saj, i cili përfshin markat e modës Prada dhe Miu Miu. Sipas saj, Versace, me bazë në Milano, ofron “potencial të konsiderueshëm të pashfrytëzuar për rritje”.
Vlera përfundimtare e marrëveshjes do të rregullohet në momentin e përmbylljes, e cila pritet në gjysmën e dytë të vitit. Ajo do të financohet me 1.5 miliardë euro borxh të ri dhe është miratuar nga bordet drejtuese të Pradas dhe Capri Holdings.
“Versace do të ruajë ADN-në e saj krijuese dhe autenticitetin kulturor, ndërsa do të përfitojë nga fuqia e plotë e platformës së konsoliduar të Grupit, përfshirë kapacitetet industriale, ekzekutimin e shitjeve me pakicë dhe ekspertizën operacionale”, thuhet në deklaratën e Prada, shkruan cnbc.
Versace, e themeluar në vitin 1978 nga i ndjeri Gianni Versace, është në pronësi të Capri Holdings që nga viti 2018, një grup që përfshin gjithashtu Michael Kors dhe Jimmy Choo.
Capri Holdings pagoi 2 miliardë dollarë për Versace, por ka pasur vështirësi ta pozicionojë shtëpinë ikonike të modës italiane në epokën e re të “luksozitetit të heshtur”, për shkak të siluetave sensuale dhe modeleve të zhurmshme që e karakterizojnë atë.
Muajin e kaluar, Capri Holdings emëroi Dario Vitale si drejtor kreativ në vend të Donatella Versace, e cila mori këtë rol pas vrasjes së vëllait të saj në vitin 1997. Vitale erdhi nga Miu Miu, marka jashtëzakonisht e suksesshme dhe e orientuar drejt të rinjve në Grupin Prada.
Donatella Versace mori rolin e ri si ambasadore kryesore e markës në këtë riorganizim, i cili u pa gjerësisht si një hap drejt shitjes së shumëpërfolur të Versace tek Prada. Miuccia Prada e pranoi interesimin e grupit në kornizën e Javës së Modës në Milano në muajin shkurt
About The Author
