Presidenti Begaj dhe Vjosa Osmani bëjnë homazhe për Papa Françeskun, shoqërohen nga krerët besimeve fetare
Presidenti i Republikës, Bajram Begaj, zhvilloi sot homazhe pranë trupit të Papa Françeskut në Bazilikën e Shën Pjetrit në Vatikan, në një ceremoni madhështore ku morën pjesë udhëheqës shtetesh, klerikë dhe besimtarë nga mbarë bota.
Në këtë nderim të lartë për Atin e Shenjtë, Presidenti Begaj ishte i shoqëruar nga katër përfaqësuesit kryesorë të komuniteteve fetare shqiptare – mysliman, ortodoks, katolik dhe bektashi – një simbol i fortë i bashkëjetesës dhe tolerancës ndërfetare, që Papa Françesku e ka vlerësuar veçanërisht gjatë vizitës së tij në Shqipëri.
Përveç Presidentit Begaj, në ceremoni morën pjesë edhe Presidentja e Kosovës, Vjosa Osmani, kardinali shqiptar Ernest Simoni, Fortlumturia e Tij Joan Pelushi (Kreu i Kishës Ortodokse Autoqefale), Imzot Arjan Dodaj (Arqipeshkvi i Tiranë-Durrësit), H. Bujar Spahiu (Kreu i Komunitetit Mysliman), Haxhi Dede Baba Edmond Brahimaj (Kryegjyshi Botëror i Bektashinjve), si dhe Gent Kruja (Kreu i Këshillit Ndërfetar të Shqipërisë).
Pjesëmarrja e gjerë e përfaqësuesve shqiptarë në këtë ceremoni ngushëllimi dhe nderimi, përforcon mesazhin e unitetit fetar dhe respektit të ndërsjellë, një vlerë e rrallë që e ka dalluar Shqipërinë në rajon dhe më gjerë.
About The Author
