Kursi UEFA C – Përmbyllet me sukses edicioni i radhës për zonën e Tiranës

Kursi për trajnerët e licencës UEFA C, i organizuar nga Federata Shqiptare e Futbollit në zonën e Tiranës ka mbyllur me sukses edicionin e radhës me diplomimin e 43 pjesëmarrësve që ishin pjesë e këtij kursi.

Në ceremoninë e rastit të organizuar në “Shtëpinë e Futbollit” ishin të pranishëm drejtues të Sektorit të Edukimit në FSHF, të cilët kanë organizuar programin dhe janë kujdesur edhe për mbarëvajtjen e këtij kursi për formimin sa më cilësor të trajnerëve të rinj.

Në edicionin e këtij kursi morën pjesë 43 të apasionuar pas futbollit, të cilët me pajisjen me licencën “UEFA C” mund të ushtrojnë profesionin e trajnerit në futbollin amator dhe mund të punojnë si zëvendës-trajnerë me ekipet e moshave që marrin pjesë në kampionatet e të gjitha niveleve të organizuara nga FSHF në vend.

Një ndër kursantët e diplomuar ishte edhe Darjan Konomi, i cili është një person me aftësi ndryshe por falë pasionit për sportin e bukur të futbollit dhe mbështetjes që FSHF i jep të gjithë këtyre personave, përmbylli me sukses kursin UEFA C. Ashtu siç është theksuar në Strategjinë e Qëndrueshmërisë “Ndërtimi i Urave Lidhëse përmes Futbollit” të lançuar në muajin prill të këtij viti synimi i FSHF-së është të paraqesë rritjen dhe zhvillimin e futbollit në të gjithë vendin dhe mbi të gjitha të theksojë ndikimin pozitiv që ky sport gjeneron në jetën e individëve në mbarë Shqipërinë.

About The Author