Më vonë sot Trumpi e quajti Zelenskin “diktator pa zgjedhje.”

Putini i kënaqur me bisedimet SHBA-Rusi

Agjencitë shtetërore ruse të lajmeve raportuan se Presidenti Vladimir Putin ishte i kënaqur pas bisedimeve të nivelit të lartë midis zyrtarëve të Kremlinit dhe përfaqësuesve të administratës së Presidentit amerikan Donald Trump.

“Po, jam informuar. Unë i vlerësoj shumë, ka rezultate,” citohet të ketë thënë ai nga Interfax për bisedimet e zhvilluara në Arabinë Saudite.

Putini tha më vonë se nuk e dinte se kur do të takohej personalisht me Trumpin, pavarësisht se ky i fundit la të kuptohej se një datë ishte caktuar për në fund të shkurtit. Putini tha se të dy palët së pari duhej të ndërtonin “besimin”.

“Është e pamundur të zgjidhen shumë çështje, përfshirë krizën ukrainase, pa rritur nivelin e besimit midis Rusisë dhe SHBA”, tha ai në një konferencë shtypi në televizion.

Eksperti: Trumpi me përpjekje për të strukturuar negociatat

DW foli me Dr. Peter Trubowitz, profesor i Marrëdhënieve Ndërkombëtare në London School of Economics, për qëndrimin e Donald Trumpit ndaj Rusisë dhe Ukrainës.

“Nuk është gjë tjetër veçse një lëvizje strategjike”, tha Trubowitz në lidhje me pohimin e Trumpit se Ukraina është përgjegjëse për luftën. “Duhet parë si është, një përpjekje për të strukturuar negociatat mbi luftën në një mënyrë që ka të bëjë më pak me garantimin e sigurisë së Ukrainës sesa, mendoj, me riorganizimin e marrëdhënieve SHBA-Rusi.”

Ai i përshkroi lëshimet e Trumpit ndaj Rusisë kështu: “Është e guximshme, është dramatike. Është një surprizë”.

Trubowitz tha se kjo ishte e gjitha një pjesë e teatrit politik për të bërë presion mbi Evropën dhe për të “përfituar nga varësia e Evropës nga SHBA”.

“SHBA e ka anashkaluar Evropënnë mënyrë efektive”, duke i bërë thirrje drejtpërdrejt Rusisë, duke e ditur se Evropa nuk ka qenë kurrë unanime në qasjen e saj ndaj pushtimit dhe duke e përdorur atë në avantazhin e saj.

“Nëse do të isha [presidenti ukrainas Volodymyr] Zelenski, nuk do të ndihesha i sigurt në aftësinë e Evropës për të udhëhequr tani.”

BE mbështet raundin e 16-të të sanksioneve ndaj Rusisë

BE ka rënë dakord në Bruksel për një raund të 16-të sanksionesh kundër Moskës.

Në vigjilje të përvjetorit të sulmit rus, 24 shkurtit, BE synon të godasë “flotën fantazmë” ruse të anijeve cisternë, e cila përdoret për të shmangur sanksionet kundër sektorit energjetik të Rusisë.

Sanksionet prekin edhe sektorin e aluminit të Rusisë. “Kjo është e domosdoshme” tha ministri i Financave të Polonisë, Andrzej Domanski, vendi i të cilit mban Presidencën e radhës të BE.

Paketa e masave pritet të miratohet formalisht nga ministrat e jashtëm të BE, por konsiderohet punë e përfunduar./DW

About The Author