SHBA nis betejën e tarifave edhe me Evropën. BE zbulon kundërpërgjigjen.

Marsela SHYTIA

Me rikthimin e Donald Trump në skenën politike, marrëdhëniet ekonomike mes Shteteve të Bashkuara dhe Bashkimit Evropian po përballen me një sfidë të re. Trump, i njohur për qëndrimin e tij proteksionist dhe politikën “America First”, ka shpallur tarifat e reja mbi produktet evropiane, duke hapur një front të ri në luftën tregtare me BE-në. Kjo lëvizje pritet të prekë industri kyçe si ajo e automobilave, çelikut dhe produkteve bujqësore, duke kërcënuar stabilitetin ekonomik të Evropës dhe duke shtuar tensionet mes aleatëve historikë. Për BE-në, kjo nuk është vetëm një çështje tarifash, por një sfidë strategjike që mund të riformësojë balancat globale.

Kundër-tarifat e BE-së

Komisioni Evropian po prezanton kundërmasa pasi tarifat e SHBA për importet e çelikut dhe aluminit nga BE hynë në fuqi dje. “Komisioni shpreh keqardhje për vendimin e SHBA për të vendosur tarifa, duke i konsideruar ato të pajustifikuara, përçarëse për tregtinë transatlantike dhe të dëmshme për bizneset dhe konsumatorët, shpesh duke çuar në çmime më të larta”, tha Komisioni. Komisioni do të aktivizojë kundërmasat ekzistuese kundër Shteteve të Bashkuara që u pezulluan në 2018 dhe 2020 nga 1 Prilli. Këto masa synojnë një sërë produktesh amerikane si motoçikletat, borboni dhe varkat dhe janë një përgjigje ndaj dëmit ekonomik prej 8 miliardë eurosh të shkaktuar nga eksportet e çelikut dhe aluminit të BE-së. Në përgjigje të tarifave të reja amerikane që prekin më shumë se 18 miliardë euro të eksporteve të BE-së, Komisioni ka njoftuar gjithashtu një paketë kundërmasash të reja për eksportet amerikane, e cila do të hyjë në fuqi në mes të prillit, pas konsultimeve me Shtetet Anëtare dhe palët e interesuara. Në total, kundërmasat që mund të zbatohen për eksportet e mallrave të SHBA-së kapin një vlerë prej 26 miliardë eurosh, që korrespondon me shtrirjen ekonomike të tarifave amerikane.

Sulmet e Trump

Presidenti amerikan Donald Trump u takua dje me kryeministrin irlandez Michael Martin në Zyrën Ovale dhe njoftoi menjëherë se SHBA do t’i përgjigjet kundër-tarifave të Bashkimit Evropian të vendosura sot. Ai gjithashtu sulmoi Irlandën, duke akuzuar vendin se përdor politikat e saj tatimore për të joshur kompanitë farmaceutike dhe kompani të tjera larg Shteteve të Bashkuara. “Ne kemi një deficit të madh me Irlandën dhe vendet e tjera dhe duam ta zgjidhim atë sa më mirë dhe do të punojmë së bashku”, tha Trump. Ai përsëriti se do të vendosë tarifa reciproke për të ndihmuar në rivendosjen e prodhimit amerikan. “Çfarëdo që të na ngarkojnë, ne i ngarkojmë. 20 apo 200 për qind, nuk ka rëndësi, do të përballen me të njëjtat masa”, tha ai. Ai vazhdoi të sulmonte Bashkimin Evropian. “BE-ja u themelua për të përfituar nga SHBA-ja”, tha ai. Më pas ai u pyet nëse Irlanda po shfrytëzonte gjithashtu SHBA-në. Komentet e Trump pasqyrojnë qëndrimin e tij ndaj tregtisë me Kanadanë dhe vendet evropiane në javët e fundit, duke thënë vazhdimisht se Kanadaja po “mashtron” SHBA-në dhe se tarifat janë pjesë e shtytjes së tij për t’i dhënë fund agjendës globale “America First”.

Kërcënimi i ri

Vendosja e tarifave të SHBA-së në pjesë të tjera të botës mund të krijojë gjithashtu probleme për BE-në. Ministri francez për Evropën, Benjamin Haddad, tha se Bashkimi Evropian mund të shkojë një hap më tej në përgjigjen e tij ndaj tarifave të SHBA-së, edhe pse një luftë tregtare nuk është në interesin e askujt. “Ne kemi mjetet për të shkuar një hap më tej nëse duam,” tha Haddad për kanalin televiziv TF1. “Për shembull, nëse do të kishte një situatë ku duhej të shkonim një hap më tej, shërbimet dixhitale ose pronësia intelektuale mund të përfshiheshin”, shtoi ai.