Tronditet Kosova, katër vrasje për tre ditë, reagon kryeministri Kurti: Duhen veprime insitucionale dhe reflekti shoqëror

Katër persona kanë vdekur si pasojë e të shtënave me armë zjarri në tri raste të ndara në tri ditët e fundit në Kosovë.

Më 23 mars, të dielën, në Vushtrri vdiq një 19-vjeçar në Vushtrri. Dorasi dyshohet të jetë një bashkëmoshatar i tij. Ai është në paraburgim dhe e ka pranuar fajësinë.

Një ditë më pas, në Vushtrri ndodhi një vrasje e dyfishtë. Një burrë dyshohet se vrau një grua dhe më pas i dha fund jetës së vet. Ky rast ndodhi në fshatin Stanoc.Ndërsa të martën në mbrëmje, një person rreth të 60-ave vdiq në Prishtinë pas plagëve të marra nga të shtënat që ndodhën në rrugën “Rrustem Hyseni”. I dyshuari është ende në arrati, sipas njoftimeve zyrtare të deritashme. Në këtë rast u plagos edhe një person tjetër, që sipas mjekëve, është në gjendje të qëndrueshme.

Kryeministri i Kosovës, Albin Kurti, ka reaguar lidhur me katër vrasjet e ndodhura në tri ditët e fundit, duke shprehur shqetësimin dhe brengën për situatën alarmante.

“Gjithë vendi është tronditur dhe lënduar nga kjo seri e vrasjeve, të cilat duhet të ndalohen dhe të dënohen. Vrasje është jo vetëm vrasje e njeriut, por e shoqërisë ku ai njeri bën pjesë, pra shoqërisë sonë”, u shpreh Kurti gjatë mbledhjes se Qeverisë ditën e mërkurë.

Ai ka bërë thirrje për veprim të menjëhershëm institucional dhe reflektim shoqëror, duke theksuar se organet e rendit duhet të trajtojnë me seriozitet rastet dhe të sigurojnë drejtësi për viktimat.