Hyjnë në fuqi tarifat e SHBA, Trump trondit tregtinë botërore: Miliarda dollarë po vijnë drejt nesh!
Tarifat e reja gjithëpërfshirëse të vendosura nga Presidenti amerikan Donald Trump kanë hyrë në fuqi, duke shënuar një përshkallëzim të mëtejshëm të luftës tregtare të SHBA-së me vendet anembanë botës.
Presidenti i bëri publike në rrjetet sociale, duke deklaruar se “Është mesnata!!! Miliardë dollarë në tarifat po rrjedhin tani në shtetet e bashkuara të Amerikës!”
Trump ka rritur ndjeshëm taksat mbi importet nga një sërë vendesh, përfshirë një tarifë 100% për gjysmëpërçuesit e prodhuar jashtë vendit dhe një tarifë prej 50% për eksportet e Indisë dhe Brazilit.
Këto masa janë pjesë e një përpjekjeje më të gjerë për të detyruar vendet të rinegociojnë marrëdhëniet tregtare me SHBA-në dhe të zhvendosin prodhimin në territorin amerikan.
ndia, e cila aktualisht është një nga importuesit më të mëdhenj të energjisë në botë, u godit me një tarifë prej 50% që hyn në fuqi më 27 gusht, nëse nuk ndalon blerjen e naftës nga Rusia. Nju Delhi e quajti këtë masë “të padrejtë, të pajustifikuar dhe të paarsyeshme”.
Ndërkohë, Brazili u përball me të njëjtën normë tarifore pasi Trump kritikoi Presidentin Lula da Silva për qëndrimet ndaj firmave teknologjike amerikane dhe për mbështetjen ndaj ndjekjes penale të ish-presidentit Jair Bolsonaro.
Ekonomitë prodhuese të Azisë Juglindore, si Laosi dhe Mianmari, u prekën ndjeshëm, me tarifa deri në 40%. Ekspertët theksojnë se këto vende janë të lidhura ngushtë me zinxhirët tregtarë të Kinës, gjë që i ka bërë objektiv të qartë të politikave të Trump.
Megjithatë, disa vende të mëdha si Japonia, Koreja e Jugut dhe Mbretëria e Bashkuar kanë arritur marrëveshje për tarifa më të ulëta. Bashkimi Evropian pranoi një tarifë prej 15% në bazë të një marrëveshjeje të re kornizë me SHBA-në.
Trump njoftoi gjithashtu një tarifë 100% për çipat kompjuterikë të prodhuar jashtë SHBA-së, por kompanitë që kanë investuar në prodhim në SHBA si TSMC (Tajvan), Samsung dhe SK Hynix (Koreja e Jugut) pritet të përjashtohen. Apple, nën presionin e administratës, njoftoi një investim të ri prej 100 miliardë dollarësh në SHBA.
Ndaj Kanadasë, tarifa u rrit nga 25% në 35% për shkak të mospërputhjeve në bashkëpunimin kundër trafikut të drogës. Megjithatë, shumica e eksporteve kanadeze mbrohen nga traktati USMCA. Ndërkohë, tarifat ndaj Meksikës janë pezulluar për 90 ditë të tjera në pritje të arritjes së një marrëveshjeje të re tregtare.
Ndërkohë, SHBA dhe Kina janë në bisedime intensive për të zgjatur një periudhë 90-ditore të pauzës së tarifave që përfundon më 12 gusht.
Trump zbuloi për herë të parë gamën e tarifave specifike për vendin më 2 prill, një datë që ai e quajti “dita e çlirimit”, duke pretenduar se pjesa tjetër e botës e kishte plaçkitur SHBA-në për dekada.
Pas një pauze 90-ditore të sjellë një javë më vonë dhe një tjetër armëpushimi katër-javor të shpallur më 7 korrik, ai konfirmoi grupin e ri të tarifave të premten e kaluar.
Dje, Trump paralajmëroi gjithashtu se SHBA-të do të vendosnin një tarifë prej rreth 100% për çipat gjysmëpërçues të importuar nga vendet që nuk prodhojnë në Amerikë ose nuk planifikojnë ta bëjnë këtë.
Ndërkohë të gjitha vendet që nuk janë në listë e kanë tarifën 10 % përfshirë këtu edhe Shqipërinë.
About The Author
