Durrës. Policia finalizon operacionin “Custom”. Arrestohet një 40-vjeçar për një seri vjedhjesh

Policia e Durrësit ka finalizuar me sukses operacionin e koduar “Custom , në të cilin është arrestuar shteasi D.B i cili ishte i shpallur në kërkim. Sipas policisë 40-vjeçari akuzohet për një seri vjedhjesh, duke filluar nga vjedhja e banesave, vjedhje të automjeteve dhe të shumave të konsiderueshme monetare.

Gjithashtu policia ka sekuestruar edhe dy automjete të 40 vjeçarit që rezultojnë të vjedhura.

Ja edhe njoftimi i plotë i policisë:

Durrës

Finalizohet operacioni policor i koduar “Custom”, kapet dhe vihet në pranga një shtetas i shpallur në kërkim për një sërë vjedhjesh, në qytetin e Durrësit.

40-vjeçari, autor i disa vjedhjeve automjetesh, banesash dhe shumash të konsiderueshme parash.

Sekuestrohen gjatë operacionit dy automjetet e vjedhura nga ky shtetas.

Shërbimet e Komisariatit të Policisë Durrës, në bashkëpunim me shërbimet e Stacionit të Policisë Plazh, në vijim të punës për parandalimin e vjedhjeve dhe zbardhjen e atyre të ndodhura më parë, bazuar në informacionet e siguruara për vendndodhjen e një shtetasi të shpallur në kërkim, organizuan dhe finalizuan operacionin policor të koduar “Custom”.

Si rezultat, u bë lokalizimi, kapja dhe arrestimi i shtetasit D. B., 40 vjeç, banues në Durrës, i shpallur në kërkim për disa vjedhje të ndodhura gjatë muajit mars.

Nga veprimet hetimore ka rezultuar se ky shtetas dyshohet se:

• më datë 18.03.2025, ka vjedhur automjetin në pronësi të shtetasit G. R., në lagjen nr. 7, Durrës;

• më datë 19.03.2025, në lagjen nr. 13, Plazh, ka vjedhur automjetin në pronësi të shtetases B. Z.;

• më datë 20.03.2025, në Shijak, duke përdorur njërin nga automjetet e vjedhura, ka vjedhur një shumë prej 10 000 dollarësh brenda në automjetin e shtetasit A. H.;

• më datë 12.03.2025, në bashkëpunim me shtetasin A. I., 44 vjeç (i arrestuar më parë nga Policia), ka vjedhur sende dhe orendi të ndryshme në banesën e shtetasit I. M.

Në cilësinë e provës materiale, u sekuestruan dy automjetet e vjedhura nga shtetasi D. B.

Nën drejtimin e Prokurorisë vijojnë veprimet procedurale për dokumentimin e plotë të aktivitetit kriminal të këtij shtetasi.

Materialet procedurale iu referuan Prokurorisë së Juridiksionit të Përgjithshëm Durrës, për veprime të mëtejshme.

About The Author