Policia e Kavajës reagon pas një postimi të një qytetari në lidhje me një grindje fizike: Porsa morëm njoftimin kemi kryer të gjitha veprimet hetimore dhe proçeduriale

Policia e Kavajës ka reaguar pas një postimi në portalin “JOQ Albania” ku një qytetar ka raportuar për një konflikt të ndodhur në zonën e Kavajës të ndodhur me 8 prill 2025.

Sipas Policisë porsa kanë marrë njoftimin për konfliktin , me datën 8 prill 2025 ka kryer brenda asaj dite të gjitha veprimet hetimore dhe proçeduriale për zbardhjen e rrethanave të ngjarjes dhe identifikim e personave të përfshirë.

Gjithashtu vazhdon më tej njoftimi i policisë specialistët për Hetimin e Krimeve të Komisariatit të Policisë Kavajë i kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Durrës ku ka nisur edhe proçedimi penal për shtetasit e përfshirë në konflikt

Ja edhe njoftimi i plotë i policisë:

Policia e Shtetit 

Në lidhje me një postim në portalin “JOQ Albania”, për raportimin e një qytetari, mbi një konflikt mes disa shtetasve, të ndodhur më datë 08.04.2025, bëjmë me dije se:

Policia e Kavajës ka marrë njoftim për këtë konflikt, më datë 08.04.2025, dhe ka kryer të gjitha veprimet hetimore dhe procedurale, brenda ditës, për zbardhjen e rrethanave të konfliktit dhe identifikimin e shtetasve të përfshirë.

Në vijim të veprimeve procedurale për rastin, specialistët për Hetimin e Krimeve të Komisariatit të Policisë Kavajë, më datë 08.04.2025, kanë referuan materialet në Prokurori ku ka nisur procedimi penal për shtetasit:

M. T., 18 vjeç, banues në Kavajë, për veprat penale “Plagosja e lehtë me dashje” dhe “Dëmtime të tjera me dashje”;

Xh. K., 18 vjeç, banues në Kavajë, për veprat penale “Plagosja e lehtë me dashje” dhe “Kanosja”;

E. H., 19 vjeç, E. H., 22 vjeç, B. H., 28 vjeç dhe F. K., 18 vjeç, të gjithë banues në Kavajë, për veprën penale “Plagosja e lehtë me dashje”.

Nga veprimet hetimore të kryera në drejtimin e Prokurorisë, dyshohet se rreth orës 11:00 të datës 08.04.2025, këta shtetas janë konfliktuar fizikisht dhe me sende të forta me njëri-tjetrin, për motive të dobëta, në ambientet e servisit të automjeteve, të shtetasit B. H., në lagjen nr. 4. Gjatë konfliktit, shtetasi M. T. ka dëmtuar një automjet që ndodhej në këtë servis.

Gjatë kontrollit në ambientet e servisit dhe në banesat e shtetasve të përfshirë në konflikt nuk janë gjetur sende të kundërligjshme.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme.

About The Author