Hamasi pranon planin e SHBA për Gazën, Trump ultimatum Izraelit: Tani ndaloni bombardimet!

Pikat kryesore të planit për t’i dhënë fund luftës në Gaza përfshijnë: lirimin e pengjeve, çarmatosjen dhe shpërbërjen e Hamasit, si dhe krijimin e një qeverie të përkohshme mbikëqyrëse, e cila do të drejtohet nga Trump dhe ish-kryeministri britanik Tony Blair.

Hamasi ka rënë dakord të lirojë të gjithë pengjet e mbetura izraelite, por kërkon negociata të mëtejshme mbi një numër çështjesh të përcaktuara në planin e paqes të SHBA-së për Gazën.

Pas deklaratës së Hamasit, Benjamin Netanyahu u shpreh se Izraeli po “përgatitet të zbatojë menjëherë” fazën e parë të planit të Donald Trump.

Gjithashtu u zotua të punojë “në bashkëpunim të plotë me Presidentin dhe ekipin e tij për t’i dhënë fund luftës”.

Njoftimet erdhën disa orë pasi presidenti amerikan Donald Trump i dha Hamasit një afat të dielën për të pranuar planin e paqes ose do të përballej me “të gjithë ferrin”.

Në një postim në rrjetet sociale, Trump thotë se beson që Hamasi është “gati për një paqe të qëndrueshme”.

Presidenti amerikan i bëri thirrje Izraelit të “ndalojë menjëherë bombardimet”, me qeverinë izraelite që tha se ishte gati për “zbatimin e menjëhershëm” të fazës së parë të planit me “lirimin e menjëhershëm të të gjithë pengjeve”.

Pikat për të cilat Hamasi bie dakord:

Hamasi pranoi të lirojë të gjithë pengjet e mbetura izraelite, vetëm disa orë pasi Presidenti i SHBA-së Donald Trump u dha një afat deri të dielën për të pranuar planin e tij të paqes për Gazën.
Gjithashtu tha se “rinovon marrëveshjen e saj për t’ia dorëzuar administrimin e Rripit të Gazës një organi palestinez të pavarurish (teknokratësh), bazuar në konsensusin kombëtar palestinez dhe mbështetjen arabe dhe islamike”.
Por Hamasi dëshiron negociata të mëtejshme mbi këto pika:

Grupi nuk përmendi çarmatimin në deklaratën e tyre. Gjithashtu nuk pranoi të mos luante më rol në qeverisjen e Gazës.

Edhe kryeministri britanik, Keir Starmer ka mirëpritur vendimin e Hamasit për të pranuar planin e propozuar nga SHBA për t’i dhënë fund luftës në Gaza. Në një deklaratë zyrtare, ai tha thotë se Britania e Madhe mbështet përpjekjet e presidentit të SHBA, Donald Trump, i cili po afron gjithmonë e më shumë drejt paqes.

“Pranimi nga Hamas i planit amerikan të paqes është një hap i rëndësishëm përpara. Ne mbështesim fuqimisht përpjekjet e Presidentit Trump, të cilat na kanë afruar më shumë se kurrë më parë drejt paqes. Tani ekziston një mundësi për t’i dhënë fund luftimeve, për kthimin e pengjeve në shtëpi dhe për t’i çuar ndihmat humanitare atyre që kanë aq shumë nevojë për to. Ne u bëjmë thirrje të gjitha palëve që të zbatojnë marrëveshjen pa vonesë. Mbretëria e Bashkuar, së bashku me partnerët tanë, është gati të mbështesë negociata të mëtejshme dhe të punojë drejt një paqeje të qëndrueshme si për izraelitët ashtu edhe për palestinezët.”, shkruan ai.

About The Author