I burgosuri humb jetën në qelinë e Fushë-Krujës, fillojnë hetimet
Mëngjesin e ditës së sotme, rreth orës 03:34, është gjetur i vetëvarur i paraburgosuri Qani Hamit Muça,në tualetin e dhomës së tij në Institucionin e Ekzekutimit të Vendimeve Penale (IEVP) në Fushë-Krujë.
Sipas njoftimit zyrtar, ngjarja ndodhi në sektorin 2, kati i dytë, godina B, ku Muça qëndronte së bashku me pesë të paraburgosur të tjerë.
Shkak për alarm u bë vonesa e pazakontë e tij në tualet, e cila u vu re nga një tjetër i paraburgosur që më pas hapi derën dhe e gjeti Muçën të vetëvarur në pjesën e grilës së ajrimit. Menjëherë u njoftuan shërbimet e sigurisë dhe ndihmës-mjeku i institucionit, ndërsa në vijim u informuan Prokuroria e Rrethit Gjyqësor Krujë dhe Shërbimi për Kontrollin e Brendshëm në Burgje (SHKBB).
Grupet hetimore mbërritën në vendngjarje rreth orës 04:00 dhe nisën procedurat për dokumentimin dhe hetimin e rrethanave të ngjarjes.
Qani Hamit Muça, i lindur më 2 korrik 1967 në Dibër dhe banues në Tiranë, ishte i divorcuar, me arsim të mesëm dhe pa precedentë penalë të mëparshëm. Ai ishte arrestuar më 12 gusht 2024 për veprat penale “Vrasje e funksionarëve publikë”, e mbetur në tentativë, dhe “Mbajtja pa leje e armëve dhe municionit”. Më 28 shtator 2024, ai ishte transferuar nga IEVP “Jordan Misja” në burgun e Fushë-Krujës.
Drejtoria e Përgjithshme e Burgjeve ka shprehur ngushëllimet e saj familjes së të ndjerit, ndërsa hetimet për zbardhjen e plotë të rrethanave të ngjarjes po vazhdojnë.
About The Author
