“CNN”: Putini prezantoi aleancat ushtarake gjatë udhëtimit në Kinë

Presidenti rus Vladimir Putin po shfrytëzon edhe një herë skenën ndërkombëtare, këtë herë gjatë një vizite zyrtare në Kinë, për të promovuar aleancat e tij ushtarake, veçanërisht atë me liderin e Koresë së Veriut, Kim Jong Un.

Parada madhështore ushtarake e mbajtur të mërkurën në Pekin ishte shfaqja e forcës së udhëheqësit kinez Xi Jinping, por në prapaskenë, Putin zhvilloi një takim të veçantë me Kim, i cili ka dërguar si municione, ashtu edhe ushtarë për të ndihmuar Rusinë në luftën kundër Ukrainës.

Putin e lavdëroi Korenë e Veriut për kontributin e saj ushtarak, duke deklaruar se ushtarët koreano-veriorë “kanë luftuar me guxim dhe heroizëm” në vijën e parë të frontit kundër forcave ukrainase.

Pas një takimi dy orë e gjysmë me Kim pas përfundimit të paradës, të dy liderët u panë duke u përqafuar, ndërsa Putin i bëri një ftesë zyrtare homologut të tij për të vizituar Rusinë.

Zyrtarët perëndimorë vlerësojnë se rreth 4,000 ushtarë koreano-veriorë janë vrarë ose plagosur në përkrahje të forcave ruse, nga një kontingjent prej afro 12,000 trupash të vendosur kryesisht në rajonin kufitar të Kurskut, për të ndihmuar në zmbrapsjen e një ofensive ukrainase.

Aleanca ushtarake, që fillimisht u mbajt në fshehtësi për muaj me radhë, tashmë është bërë e hapur. Kim së fundmi ka shprehur publikisht dhimbjen për viktimat në radhët e ushtrisë së tij, ndërsa Koreja e Veriut ka publikuar edhe një video propagandistike që glorifikon pjesëmarrjen në luftë në krah të Rusisë.

Kjo shfaqje e pashkruar force vjen vetëm pak javë pas një takimi të Putinit me Presidentin amerikan Donald Trump në Alaskë, ku dy liderët diskutuan mundësinë e një fundi për konfliktin në Ukrainë.

Gjatë fjalës së tij në samitin e Organizatës së Bashkëpunimit të Shangait, para paradës ushtarake, Putin dha sinjale të qarta se nuk ka ndryshuar qëndrimin e tij që prej nisjes së agresionit të plotë në shkurt 2022, duke fajësuar Perëndimin për atë që ai e konsideron si shkakun kryesor të luftës: revolucioni i Majdanit në vitin 2014, që çoi në përmbysjen e presidentit pro-rus Viktor Janukoviç.

Ndërkohë që Putin ndodhej në Pekin për paradën ushtarake, në Ukrainë ra sërish alarmi ajror: mbi 500 dronë dhe dhjetëra raketa lundruese u lëshuan nga Rusia brenda natës, duke konfirmuar se vendosmëria e Kremlinit për të vazhduar luftën nuk ka lëkundje.