Ja si u përgjua banda e Durrësit, kryeministri Rama jepte lejet e ndërtimit, SPAK gjen prova tek telefoni i mikut të “Rrumit”
Dosja hetimore e Prokurorisë së Posaçme (SPAK-ut), një dokument 236-faqësh që ka shkundur themelet e Durrësit, zbulon për herë të parë se si banda famëkeqe e “Rrumit të Shijakut” kishte ngritur një sistem të tërë për tjetërsimin e pronave në bregdet. Në qendër të rrjetit që përfshinte ish-zyrtarë, noterë dhe njerëz të afërt me politikën, del emri i Aleksandër Lahos, alias “Rrumi”. Hetimet zbuluan se përmes aplikacionit të enkriptuar “Sky ECC”, ai dhe bashkëpunëtorët e tij komunikonin për pazare toke, plane vrasjesh dhe ndërhyrje në Kadastrën e Durrësit. Një bisedë e përgjuar mes “Rrumit” dhe Vullnet Muçës tronditi hetuesit: aty përmendej emri “Monika”, që sipas dosjes, i referohej ish-deputetes Monika Kryemadhi.
Në të njëjtën bisedë përmendet edhe “Fredi”, ndërsa diskutoheshin përfitime, tokë, dhe ndërhyrje në institucione. Nga një celular i sekuestruar pas atentatit të bujshëm të prokurorit Arjan Ndoj, u zbuluan materiale tronditëse: video, foto dhe dokumente që implikonin zyrtarë të lartë. Në mesin e tyre, SPAK identifikoi Irgen Kërçukun, zyrtar i Avokaturës së Shtetit, i cili sipas hetimeve, kishte marrë rryshfet për të mos apeluar një vendim pronësie. Por historia mori kthesë dramatike kur Kërçuku u dhunua, paratë iu morën mbrapsht dhe më pas u dënua për korrupsion bashkë me “Rrumin”. Në dosje flitet për 18 pasuri kadastrale të sekuestruara në Lalëz dhe Sheta, zona ku toka vlente ar më shumë se ari. Çdo gjurmë dokumenti çonte tek një falsifikim: fletë të rishkruara, vula të zhdukura, e regjistra të hipotekës të manipuluar.
Skema e madhe e pronave, nga falsifikimi në Kadastrën e Durrësit tek “mafia e Lalzit”
Ndërkohë hetuesit e SPAK zbuluan se grupi i “Rrumit” kishte ndërtuar një mekanizëm perfekt të grabitjes së pronave. Punonjës të ASHK-së dhe ish-zyrtarë të hipotekës kishin bashkëpunuar me kriminelët për të regjistruar tokat në emër të “banorëve fiktivë”. Në të vërtetë, pas çdo dokumenti qëndronte një marrëveshje, një zarf, një premtim për metra katrorë në bregdet. Hetuesit arritën të rindërtojnë një skemë të frikshme: dokumente origjinale fshiheshin, fletët e regjistrit zëvendësoheshin, dhe pronat kalonin në emra të rinj për t’u shitur më pas milionerëve të rinj të krimit.
Në zonat më të lakmuara – Kepi i Rodonit, Rëra e Bardhë, Gjiri i Lalzit – tokat e vjetra bujqësore u kthyen në “resorte fantazmë” të planifikuara për oligarkët e rinj. Sipas dosjes, disa nga këto prona ishin përfituar “sipas ligjit 7501”, por në realitet dokumentet ishin falsifikuar nga rrënjët. Në aplikacionin Sky ECC, grupi diskutonte hapur për “prona të djegura”, “tapitë që do rregulloheshin”, dhe “lidhjet me drejtuesit e Kadastrës”. Një nga mesazhet, që SPAK e ka përfshirë në dosje, flet për “miratimin e lejeve nga lart”, referencë që hetuesit e lidhin me struktura politike në pushtet. Në total, flitet për mijëra hektarë tokë të grabitura, të cilat janë sekuestruar pas dy vitesh hetim intensiv. Prokurorët e cilësuan këtë “një nga aferat më të sofistikuara të dekadës”.
Krimi që solli Ramën në pushtet
Por ndërsa hetimet për “Rrumin” tronditin Durrësin, gazetari investigativ Artan Hoxha lëshon një tjetër bombë në media. Sipas tij, Edi Rama u soll në pushtet nga krimi dhe më pas e shpërbleu me tendera, koncesione dhe prona strategjike. “Ky njeri, tha Hoxha, erdhi bashkë me ta, me marrëveshje që s’e kuptonim në moment. Ai i ktheu trafikantët në biznesmenë.” Gazetari kujtoi operacionet e para të qeverisë socialiste: “Fundi i marrëzisë” dhe “Lazarati”, që sipas tij ishin mënyra për të marrë kontrollin e tregjeve ilegale. “Pas 2015-ës, vendi u kanabizua. As ambasadat nuk flisnin. Ishte skema e Ramës për të mbajtur pushtetin,” deklaroi ai.
Më pas erdhën zgjedhjet e 2017-ës, ku sipas tij, “organizatat kriminale ishin pjesë e fushatës, dhe 2021 u fitua me kokainën”. “Me një ton kokainë, fiton jo një palë zgjedhje, por disa”, ironizoi ai dje. Sot, sipas Hoxhës, “kufiri mes politikës, biznesit dhe krimit është zhdukur”. Ai përfundon me një frazë që po bëhet virale: “Rama i mësoi bosët e krimit të mos shesin më drogë, por të marrin tendera. Nga kallashnikovët kaluan tek kontratat publike.” Pra në këtë rrëfim, tabloja e Shqipërisë del e zymtë: një shtet ku politika, krimi dhe pushteti janë bërë një. Dhe SPAK, me dosjen e Lalzit në duar, ka në dorë çelësin e një prej skandaleve më të mëdha të tranzicionit shqiptar.
About The Author
